2 чэрвеня 2022 года музей “Вучэбная кніга ў гісторыі адукацыі” наведалі слухачы Інстытута павышэння кваліфікацыі і перападрыхтоўкі Беларускага дзяржаўнага педагагічнага ўніверсітэта імя Максіма Танка, якія навучаюцца і працуюць па спецыяльнасці “Сацыяльная педагогіка”. Тэматычную адрасную экскурсію правёў С. М. Бітчанка.
Экспазіцыя музея дазволіла педагогам азнаёміцца з вучэбнымі кнігамі, якія выкарыстоўваліся ў адукацыйным працэсе навучальных устаноў на тэрыторыі Беларусі ў розныя гістарычныя перыяды. Была адзначана сістэмнасць і глыбіня экспазіцыі. Асаблівую цікавасць у наведвальнікаў выклікалі педагагічныя часопісы выхаваўчай накіраванасці, якія выдаваліся ў XIX – пачатку XX стст. («Сям’я і школа», «Навучанне і выхаванне», «Веснік выхавання» і іншыя). Педагогі звярнулі ўвагу на традыцыйна ўсвядомленую беларускай адукацыяй значнасць сямейнага выхавання падрастаючага пакалення. Высокую ацэнку атрымала таксама прадстаўленне ў музеі навуковай і метадычнай літаратуры па грамадзянскім і патрыятычным выхаванні.
У кнізе водгукаў музея “Вучэбная кніга ў гісторыі адукацыі” слухачы Інстытута павышэння кваліфікацыі і перападрыхтоўкі БДПУ імя Максіма Танка пакінулі запіс: “Вельмі рады, што культурным адраджэннем і гісторыяй кнігавыдання нашай краіны займаюцца людзі, па сапраўднаму захопленыя гісторыяй. Жадаем росквіту, удзячных наведвальнікаў і далейшага пашырэння межаў музея”.
