1970-я гады – час палітычнай стабільнасці і эканамічнага дабрабыту ў СССР, новых навукова-тэхнічных дасягненняў. У 1970–1973 гг. створаны першыя ў свеце планетаходы – «Месяцаход-1» і «Месяцаход-2» – дыстанцыйна-кіраваныя самаходныя апараты для даследавання Месяца. З 1974 г. пачалася рэалізацыя серыі праграм па пілатуемай касманаўтыцы на арбітальных станцыях «Салют», распрацоўка станцыі «Мір» і касмічнага карабля «Буран». Пётр Клімук і Ўладзімір Кавалёнак першымі сярод беларусаў сталі лётчыкамі-касманаўтамі СССР і двойчы Героямі Савецкага Саюза. Уся краіна ўдзельнічала ў будаўніцтве Байкала-Амурскай магістралі. У БССР хуткімі тэмпамі ішло развіццё радыёэлектронікі і інтэгральнай мікраэлектронікі, вылічальнай тэхнікі. Значныя навукова-тэхнічныя дасягненні рэалізаваны дзякуючы якаснай савецкай адукацыі.
1970/71 н. г.
Пачатковая школа пераходзіць на трохгадовы тэрмін навучання. Сістэматычны курс асноў навук пачынае выкладацца з чацвёртага класа.
1970–1971 гг.
У сувязі са зменай тэрмінаў атрымання пачатковай адукацыі ўзрастае роля дашкольных дзіцячых устаноў як абавязковай ступені падрыхтоўкі дзяцей да школы, першаснага звяна сістэмы адукацыі.
Працуе 115 школ-інтэрнатаў, мэта якіх стала забеспячэнне спрыяльных умоў для ўсебаковага развіцця дзяцей і іх выхавання.
1972 г.
Пастановай ЦК КПСС і Савета Міністраў СССР «Аб завяршэнні пераходу да ўсеагульнай сярэдняй адукацыі моладзі і далейшым развіцці агульнаадукацыйнай школы» пачынаецца мадэрнізацыя адукацыі.
Уводзяцца новыя вучэбныя планы і праграмы. Новыя праграмы ў пэўнай ступені павышаюць узровень адукацыі, але аб’ём і складанасць вучэбнага матэрыялу аказваюцца завышанымі, што прыводзіць да перагрузкі вучняў.
1974–1977 гг.
Для ўзаемасувязі працоўнай, політэхнічнай і прафесійнай падрыхтоўкі, свядомага выбару рабочых прафесій распаўсюджанай формай працоўнага навучання становяцца вучэбна-вытворчыя камбінаты.
1975 г.
У БССР завершаны пераход да ўсеагульнай сярэдняй адукацыі.
98 % выпускнікоў 8-х класаў працягваюцьі вучобу ў 10-гадовай школе і ў сярэдніх спецыяльных навучальных установах.
1978–1979 гг.
Колькасць школ з падоўжаным днём павялічваецца да 60, груп – да 2878 (1960/61 – 13 школ, 940 груп).
Большасць школ працуе ў тыпавых будынках са спортзаламі, майстэрнямі, прадметнымі кабінетамі.